Marathi Science Dictionary
मराठी विज्ञान शब्दकोश
Meaning of ‘Lead-Acid Cell’ in Marathi
‘Lead-Acid Cell’ चा मराठी अर्थ
शब्द: Lead-Acid Cell
उच्चार: लीड-ॲसिड सेल
अर्थ: शिसं-आम्ल विद्युतघट, ओल्या/द्रव विद्युतघटाचा प्रकार
अधिक माहिती: शिसं-आम्ल विद्युतघटामधे शिश्याचे (Pb) एक विद्युतअग्र म्हणजे electrode व लेड डायॉक्साईड (PbO₂) चे दुसरे विद्युतअग्र विरल सल्फ्युरिक आम्लामधे बुडविलेले असते. लेड डायॉक्साईड /PbO₂ या विद्युतअग्रावर धन प्रभार (+) असतो, तर लीड/शिसे/Pb ह्या विद्युतअग्रावर ॠणप्रभार (-) असतो. घटामधील विद्युतअग्र व सल्फ्युरिक आम्लामधे विद्युतरासायनिक अभिक्रिया घडून येते ज्यामुळे दोन्ही विद्युतअग्रांवर विद्युतप्रभार तयार होतो. दोन्ही विद्युतअग्र परिपथाला जोडल्यास परिपथातून विद्युतप्रवाह वाहतो. विद्युतअग्रांमधील विभवांतर सुमारे 2 Volt इतके असते. ह्या प्रकारचे घट विद्युतविमोचन किंवा Electrical discharge म्हणजेच विद्युतसाठा वापरून संपल्यानंतर पुन्हा विद्युत प्रभारित करता येतात. या प्रकारच्या विद्युतघटांचा वापर मोटारी, ट्रक, मोटारसायकली, यांच्यामधे तसेच अखंड विद्युतशक्ती पुरवठायंत्रे म्हणजे UPS/Inverter मधे केला जातो.